Gorputza. Munduko biztanle guztiok batzan duguna, gero gorpua ere bai: jaio eta gorpu bihurtu arte, gorputz gara. Hor bukatzen da berdintasuna.
Gorputz aberatsak, ondo elikatu eta zainduak, kezkarik handienetakoa oporrak non igaro dutenak.
Gorputz pobreak, aski jaki ez dutenak, bizileku erosorik ere ez. Oporren kontzeptua bera ere ez dute izaten askotan.
Gorputz trukea. Hamas talde anker gaizkileak ez-dakit-zenbat gorputz eta ez-dakit-zenbat gorpu eskaintzen dizkio Israeleko agintari anker are gizkileagoari.
Gorputz salmenta eta alokairua. Prostituzioaren bidezkoa, gehiegitan proxeneta diruzale gupidagabeen esku, eta ez gorputzaren jabeenean.
Gorputz artifizialak. Adimen artifizialari, goragoko maila batera garatzeko, gorputzaren bidez ikasten dena falta omen zaio. Orain gorputz fisikoa behar du, beraz, guk umetatik ikasten duguna ikasteko: igurtziaren ondorioa azalean, tenperaturarena; grabitateaz ohartzea gauzen pisuaren bidez.
Gorputzarekiko harremana. Aldatzen ari da orain zientziaren eskutik, gorputz atal artifizialak jartzen dizkigutelako, azala lisatzeko ebakuntzengatik.
Gorputz zahartuak. Bizitzearen ezinbesteko ondorio dazahartzea. Denboraren poderioz gorputza hazi eta, ondoren, zahartu egiten zaigu. Adimena, ez nahitaez, ez dirudi behintzatezinbestean eta berez haztendenik.
Gorputzaren kontzientziarik eza. Berrogei urte gutxiago balitu ere, amorante hartuko ez nukeen gizon bati irribarre egiten diot trenean eta begirada desbideratzen du.
Gorputzaren memoria. Plazerik gabe eta gogoz kontra jasandako hura, itxuraz ahaztuta geneukana, pizten digunean beste gorputz baten ukituak.
Gorputz-ia-gorpua. Hain gutxi gelditzen zitzaion Francori gorpu izateko, hain gutxi, hilabete gutxi batzuk. Halaz ere, ia gorpu zen gorputz haren botere egiturak bost gazteren heriotz ankerra agindu zuen. Bost mutil. Hiru galiziar, bi euskaldun.
Gorpu alferrikakoak. ETAk, ez-dakit-oraindik-zer lortzeko, zenbat gorputz bihurtu zituen gorpu naturak oraindik bizitzeko denbora uzten zienean.
Gorputz desitxuratuak. Gaixotasun edo istripu batek desitxuratu dituen gorputzek maiz erakusten dute bizitzeko indar miresgarria, aurrera egiteko gogo indartsu eta duinenen bultzadaz.
Gorputz eredugarriak. Gazte eta ez hain gazte -diotenez gehienbat emakume, baina ez bakarrik- sufrimendura eta gaixotasun fisiko edo mentaletara eramaten dituzte eredugarritzat jo eta saltzen diren gorputz inposible horiek.
Gorputz militarrak. Uniformez jantziak. Profesionalki ikasten dutenak hiltzen. Bizirauteko eta gutxi batzuk aberasteko, gerrak ezinbesteko dituen arma-industriaren berme eta bezero nagusi.
Gorputz berritsuak. Etengabe hizketan doaz kalean, edonon, beren telefonotxoarekin, han ez dagoen gorputzen batekin hizketan, inguruan dauzkaten gorputzak ikusi ere egin gabe.
Gorputz baldintzagabeak. Zakurren gorputza, gorputz handi hori kaleko eskalearen ondoan edo txikiagoa, jabeak xorroan eraman dezakeena: konpainia egiten dieten gorputz epel biziak.
Gorputz- gorpu: bi hitz, bi esanahi, jatorri berekoak, latinezko corpus hitzaren emaitzak euskaraz. Euskara bizi eta indartsua zuten halako moldaketak egin zizkiotenek latinezko formari. Bizi eta indartsu, nahiz eta latinarekin edo latinaren umeekin bizi, elkarbizi. Orain ordea gelditzen zaigun gure inguruko latinaren umea, bota egin nahi dugu ondotik. Ez dugu euskararekin bizitzea nahi, ez dugu bikoiztasunik nahi, ezin jasan dugu gure unibertsitate publikoa Euskal Herriko Unibertsitatea eta Universidad del País Vasco deitzea. Lehenago zokoratu genuen gaztelania orkestra sinfonikoaren izenetik ere eta euskaraz bakarrik utzi genuen. A, eta ingelesez, ingelesez ere bai, national gehituta hizkuntza horretan: Basque National Orchestra.Ez da oso maltzur izan behar hizkuntzaren erabilera sinboliko esklusiboa nondik datorren asmatzeko. Pena da, ordea, hizkuntzak ez direla sinboloetatik bizi, erabileratik baizik. Euskara gorputz izatetik gorpu izateko bideanez zuten inguruko hizkuntzek jarri, hiztunen uzteak baizik.
