(Galde 02, uda-primavera/2013). Giza eskubideen egoerari buruzko urteroko txostenaren aurkezpenean, Amnistia Internazionalek salatu egin zuen “erretorika populista, errefuxiatu eta migratzaileen kontra egiten duena”, eta zehazki etorkinen eta asilo-eskatzaileen kontrako Europar Batasuneko politika gero eta murriztaileagoak nabarmendu zituen, baita Europako herrialde askotan gutxiengo etnikoek –ijitoek, kasu– pairatzen duten etengabeko jazarpena ere. Erakundeko idazkari nagusiak, Salil Shettyk, paradoxa dela nabarmendu zuen EBk iaz Bakearen Nobel saria jaso eta, aldi berean, immigrazioaren kontrako politika-saldo horretan parte hartzea, ez baita hain erraza bereiztea gatazka armatuetako biktimak eta etorkizun ekonomiko hobe baten bila dabiltzanak. “Gatazka-egoerei modu eraginkorrean heltzen ez zaienez, izaera globaleko bigarren mailako klase bat sortzen ari da. Babesik gabe daude gatazketatik ihes egiten dutenen eskubideak. Gobernu gehiegi daude migrazio-kontrolen izenean giza eskubideen kontrako gehiegikeriak egiten dituztenak, nabarmenki gaindituz zilegi diren mugen kontrolerako neurriak”, Shettyren hitzetan.

Biltzen eta azpimarratzen du: Koldo Uranga.